Qëllimi i kësaj iniciative të përbashkët është garantimi i një mjedisi të nxëni të sigurt për nxënësit, stafin dhe komunitetin e shkollës. Përfshirja e oficerit të sigurisë në shkollë synon rritjen e sigurisë përmes mbështetjes dhe ndërveprimit.
Një program për sigurinë në shkollë
Siguria në shkollë është një element thelbësor i parandalimit të dukurive negative, si brenda ashtu edhe jashtë mjediseve të shkollës. Lufta kundër dukurive të tilla, si episode të dhunës, përdorimi i drogave dhe substancave abuzive, dukuria e bulizmit, siguria fizike në shkolla etj., janë prioritet i Ministrisë së Arsimit, Rinisë dhe Sporteve dhe i Ministrisë së Brendshme.
Qëllimi i kësaj iniciative të përbashkët është garantimi i një mjedisi të nxëni të sigurt për nxënësit, stafin dhe komunitetin e shkollës. Përfshirja e oficerit të sigurisë në shkollë synon rritjen e sigurisë përmes mbështetjes dhe ndërveprimit me aktorët e shkollës.
Përfitimet e programit për shkollën
• Rrit sigurinë në shkollë dhe përreth saj.
• Vendos theksin në zgjidhjen e problemeve dhe në parandalimin e tyre.
• Siguron përgjigje të shpejtë ndaj problemeve/çështjeve dhe zgjidhje të vazhdueshme të tyre.
• Nxit ndërveprimin e nxënësve dhe të rinjve me policinë, si dhe rrit besimin dhe komunikimin me të. Siguron formën më të mirë të mundshme të policimit të komunitetit.
Çfarë janë oficerët e sigurisë në shkollë?
Oficerët e sigurisë në shkollë janë burime të vlefshme të shkollave për krijimin e një mjedisi të sigurt, përmes ndërtimit të marrëdhënieve të forta e të qëndrueshme me nxënësit, stafin e shkollës, prindërit dhe komunitetin. Ato janë të përgatitur dhe të trajnuar për të përmbushur rolet e tyre.
Oficerët e sigurisë në shkollë përmbushin disa role.
Si oficerë të zbatimit të ligjit:
• parandalojnë dhe menaxhojnë rastet e krimit dhe të dhunës në shkollë, duke kontribuar në ndërgjegjësimin e nxënësve për rregullat, autoritetin dhe drejtësinë;
• punojnë ngushtë me drejtorinë e shkollës dhe me stafin e saj për parandalim dhe ndërhyrje në rastet e thyerjes së disiplinës, për menaxhimin e krizave dhe në rastet e emergjencave etj.;
• shërbejnë si urë lidhëse ndërmjet policisë, të rinjve dhe shkollës.
Si këshillues për ligjin dhe sigurinë:
• shërbejnë si partnerë dhe këshillues të administratës së shkollës;
• evidentojnë, raportojnë dhe, në bashkëpunim me psikologun e shkollës ndërmjetësojnë situata konfliktuale brenda mjediseve të shkollës;
• u ofrojnë prindërve asistencë për zgjidhjen e situatave të ndryshme dhe për menaxhimin e konflikteve.
Si edukatorë:
• marrin pjesë në takimet me prindër dhe në takime periodike të stafit pedagogjik të shkollës për evidentimin e problematikave dhe diskutimin e zgjidhjeve për sigurinë në shkollë;
• në mënyrë periodike, zhvillojnë leksione ose biseda me nxënësit, me qëllim ndërgjegjësimin rreth dukurive dhe kërcënimeve të mundshme, si dhuna, substancat narkotike, trafikimi, siguria fizike nga zjarri etj.;
• shërbejnë si modele rolesh pozitive për nxënësit dhe edukojnë vlerat e sistemit tonë ligjor.
Vëmendje! Oficerët e sigurisë në shkollë:
• nuk zëvendësojnë rolin e mësuesit në lidhje me përkujdesjen, mbikëqyrjen, sigurimin e disiplinës, rregullit dhe sigurisë në klasë, në shkollë e jashtë saj;
• nuk ndërmarrin masa disiplinore në shkollë, por raportojnë çdo shkelje të disiplinës së shkollës pranë administratës së shkollës;
• nuk zhvillojnë kontrolle fizike apo të mjediseve, përveç rasteve të emergjencave dhe vendimit nga administrata e shkollës.
Me cilët aktorë ndëvepron oficeri i sigurisë në shkollë?
Oficeri i sigurisë në shkollë komunikon dhe ndërvepron me nxënësit, mësuesit, psikologun dhe punonjësin social të shkollës, drejtuesit, prindërit, komunitetin e shkollës, Drejtorinë Arsimore Rajonale dhe Policinë e Shtetit.
IZHA
© Portali Shkollor – Të gjitha të drejtat e rezervuara. Ndalohet kopjimi pa lejen tonë.
